Winnipeg! Explore “The Speech Act Project”

Ryan Gorrie

Bizindaadiwag (2022)

Michelle Jean Park, 65 Granville Street, Winnipeg Mb

Ezhinaagwak Dezhiikigaadeg

“Bizindaadiwag” inwaade ayizhichigeng ji-noondaagwak Anishinaabe inwewin, gakina ji-noondamowaad. Mii o’o ji-bizinjigaadeg inwewin bebakaan ayapiitiziwaad gaagiigidowaa, bebakaan gaye initaagoziwaad. Mii gaye owe bigo awiya gegwe-gikendang anishinaabemowin akawe ji-bizindang, maagizhaa daa-gaagiigido, ji-gaganoonaad bebakaan awiyan ayendoodaminid. Aanikebidaaganiwan inwewin, gaa-ombigi’aawasod izhi abinoojiiyan, apii maajii-bimaadiziyang minik ji-booni-bimaadiziyang.

Owe ozhichigan, niizh abiwinan bebakaan apiitaagin, a’a abinoojii zhigwa a’a gichi-aya’aa. Ezhi-niizhingin dagote imaa Anishinaabe inwewin zhigwa aanikesing imaa aayaazhoog mamazinising mitakamigaang. Iwe gaa-aayaazhoog gaa-mamazinaag gimikanaaminaanan gibimaadiziwining, neniizhaaso-jaajiibwaagin inwaadeg gibimaadiziwininaanan. Gaa-niibawikidegin wenji-noodaagwak, inwaade manidoowang gegoo. Gidagoshinimin akiing ajajaakowiwin, ginagadakiimin gaye mii izhi bezhigwan.

Bizindaadiwag aanind iwe Speech Act Project gaa-ijigaadeg, ji-wiiji’iwemagak ji-ani-gikenjigaadeg Anishinaabe inwewin, ji-gaanzomindwaa awiyag ji-bizindamowaad akiing ayinwaadegibaniin. Gaawiin eta bebakaan gaa-noondaagwakin gegoon inwewining, ikidowinan imaa atewan, inwaajigan, gikenjigeng izhitwaawin ji-wiiji-ayaang gakin gegoo gaa-gii-ozhichigaadeg.

Awenen a’a Omazinichige

Ryan Gorrie onibii’ige, mazinichige gaye onji Bingwi Neyaashi Anishinaabek. Owiijitoon ji-ani-ayaamagak Anishinaabe izhitwaawin onji imaa gegoon gaa-ozhichigaadegin izhichigewining onji zhigwa gichi-ozhichiganan akiing etemagakin.

Aabajichigan – SpeechTrails (2022)

Link for SpeechTrails app (Designed for Apple products): https://apps.apple.com/ca/app/speech-trails/id1634475365

Bigo apii, gidaa-gaachidinaanan ini miziwe bimi-ayaang. Niwii-onatoomin iwe Mobile App aabajichigan ji bizinjigaadegin oshki-dibaajimowinan, gete-dibaajimowinan gaye. Mii owe ji-mikigaadegin ono dibaajimowinan akii-mazina’iganing bigo apii ji-bizinjigaadegin gabeya’ii. Imaa ge-gikinawaajichigaadegin akii-mazina’iganing, dibaajimowin iwe, mazinichigan gemaa bakaan gegoo izhitwaawining. Ninandawendaamin ji-anishinaabebii’igeng agwajaya’ii omaa enokiiyaang zhigwa imaa Winnipeg miikanawan.

The Speech Act Project (2021-2023)

Ekidong onji iwe Izhichigewin

Igi Urban Shaman Contemporary Aboriginal Art Gallery wiijichigemaawaad ini Winnipeg Trails Association gaa inindwaa da-niigaaniwag ji-wiijitoowaad Anishinaabe Inwewinan, gechiwaag awiyag bigo ezhi-nisidotamowaad, ji wiijitoowaad imaa omazinichigewiniwaang zhigwa odibaajimowiniwaan. Bebakaan endasingin inwewinan inendami’iwemagadoon, aaniin ekidoomagakin, aaniin gaye bebakaan ezhisingin gaagiigidong, aaniin gaye awiya noonde-ikidod gegoowan. Naagadaewnjigaadegin inwewinan, aaniin awiya wiin igo ayikidod, ayinendang gaye, wiin gaye igo gegoon da-doodam ini gaa-gii-inwaadang gaagiigidod. Aaniin giigidowin ayizhiseg da wiijiiwesemagad aaniin Anishinaabe omazinichigeg ge-wiiji’iwemagak gikendaasowining izhi, zhigwa gaye aaniin ge-izhi-wanichigaadesinog Anishinaabe inwewinan.

Miigwech gaa-wiijiyaang… Canadian Heritage – Indigenous Languages and Cultures Program – Indigenous Languages Component, The Trans Canada Trail , The Asper Foundation, First Unitarian Universalist Church of Winnipeg, Government of Canada, Tokyo Smoke in the Exchange