The Speech Act Project

Oshki-wiiji’idiwin igi Urban Shaman Gallery zhigwa Winnipeg Trails Association imaa iwe “The Speech Act Project.”

The Speech Act Project

Ekidong onji iwe Izhichigewin

Igi Urban Shaman Contemporary Aboriginal Art Gallery wiijichigemaawaad ini Winnipeg Trails Association gaa-inindwaa da-niigaaniwag ji-wiijitoowaad Anishinaabe Inwewinan, gechiwaag awiyag bigo ezhi-nisidotamowaad, ji-wiijitoowaad imaa omazinichigewiniwaang zhigwa odibaajimowiniwaan. Bebakaan endasingin inwewinan inendami’iwemagadoon, aaniin ekidoomagakin, aaniin gaye bebakaan ezhisingin gaagiigidong, aaniin gaye awiya noonde-ikidod gegoowan. Naagadaewnjigaadegin inwewinan, aaniin awiya wiin igo ayikidod, ayinendang gaye, wiin gaye igo gegoon da-doodam ini gaa-gii-inwaadang gaagiigidod.

Aaniin giigidowin ayizhiseg da-wiijiiwesemagad aaniin Anishinaabe omazinichigeg ge-wiiji’iwemagak gikendaasowining izhi, zhigwa gaye aaniin ge-izhi-wanichigaadesinog Anishinaabe inwewinan.

Nashke dash:

Abiwin Gaa-gii-atood Ryan Gorrie

Wiiji’igod Brook McIlroy Inc., Ryan Gorrie oga-ozhitoon gegoo North Winnipeg Parkway imaa Michelle Jean Park, Norquay Community Centre gaa-ijigaadeg – abiwin noondaagwak. Awashime iga-wiindamaagoo eni-onachigeyaang.

Ogii-bi-wiijichigemaa’ Brook McIlroy gaa-inimind Ryan Gorrie apane 2009 gaa-akiwaninig apii gaa-gii-bakinaaged iwe onji Spirit Garden imaa Thunder Bay ji-wiiji’aad ini ge-wii-ozhichigenid, mii dash ogii-maajii-wiidanokiimaa’ 2016 gaa-akiiwaninig imaa ji-niigaaniid Winnipeg dazhi dago igi Indigenous Design Studio gaa-inindwaa. Ryan onji imaa Bingwi Neyaashi Anishinaabek (Sand Point First Nation imaa Lake Nipigon) owiijitoonaawaa’ gaye Anishinaabe Izhitwaawin gegoo dawisewaad ji-ozhitoowaad daabishkoo gegoo izhi’owining aabadakin abooshke gegoo mechaagin ji-onachigaadegin. Aginjigaadeni omazina’igan onibii’igedimaa Manitoba.

2018 gaa-akiiwaninig, Ryan odoozhichigan iwe UNCEDED: Voices of the Land gaa-ijigaadenig imaa Venice Biennale imaa dagwiimagak 17 miinawaa gegoon bakaan Anishinaabe onibii’igeg gaa-gii-ozhitoowaad miziwe sago omaa akiing. Odoozhichiganan gii-bakinaagemagadoon iweni gaa-izhichigenid onji Ontario Association of Architects, Royal Architectural Institute of Canada, and Ontario Wood Works gaa-inindwaa. Ji-wiijitood Anishinaabeg odoozhichiganiwaan ji-dagoteniging i’i dinookaaning, ogii-wiiji’aa ini Brook McIlroy gaa-inimind ji-ondaanid Anishinaabe’ ji-wiiji’igowaad odizhichigewiniwaang. Owiiji’aa’ gaye Anishinaabe iwe gekina’amawindwaa zhigwa weshkaadiziig enokiiwaad imaa.

Aabajichigan – A Fortress of Indigenous Stories izhinikaadewan.

Bigo apii, gidaa-gaachidinaanan ini miziwe bimi-ayaang. Niwii-onatoomin iwe Mobile App aabajichigan ji-bizinjigaadegin oshki-dibaajimowinan, gete-dibaajimowinan gaye. Gaamashi niwiindanziimin ge-izhinikaadamaang. Mii owe ji-mikigaadegin ono dibaajimowinan akii-mazina’iganing bigo apii ji-bizinjigaadegin gabeya’ii. Imaa ge-gikinawaajichigaadegin akii-mazina’iganing, dibaajimowin iwe, mazinichigan gemaa bakaan gegoo izhitwaawining. Ninandawendaamin ji-anishinaabebii’igeng agwajaya’ii omaa enokiiyaang zhigwa imaa Winnipeg miikanawan.

Bezhig ikidowin owe gaa-giizhigak

Anishinaabemowin zhigwa Omashkiigoomowin aabadadoon endaso-giizhig ezhi-niizhingin ini endananokiing. Gikino’amaageng ini Anishinaabe inwewinan imaa onji ozhichiganining niiyaab ji-ganandawaagin ini omaa Mikinaako-minisiing. Gegoo nesidawinigaadegin enwaadegin ikidowining wiiji’iwemagad ji-gikenjigaadegin. Ikidowinan ge-aabadakin gagwedweng gegoon daabishkoo “daga babaamosedaa”, anamikawad awiya “Aaniin” zhigwa gegoo ge-waabanjigaadegin babaamoseng daabishkoo “ziibi.”

Ji-gikendaman inwewinan imaa onji Languages With B (miina ekidong LLB)

Iwe LLB gaa-ijigaadeg onoondaagwatoonaawaan Anishinaabemowin zhigwa Omashkiigoomowin ji-miigiweng “Word of the Day” apan 2021 gaa-akiiwaninig. Endasing bizinjigan, oga-niitaanitaan Brennan Mackay (B onji imaa LLB), ji-bizinjigaadegin gegoon ji-wiiji-gagwejichigemad Brennan zhigwa ini ge-andomaad. Nimbagosendaamin ji-gikenjigeng onji ge-niigaaniid zhigwa ge-andomaad wegonenan ge-izhiwebiziyan gagwe-gikendaman Anishinaabe gemaa Omashkiigoo inwewinan, ji-wiijichigeng aaniin ayenindiwaad dago gaye nayendamowaad awenen gegwe-gikendamowaad. Ge-maajiseg apii Dagwaagig 2021 ge-izhiseg.

Mii ono ge-moojigitoong imaa The Speech Act Project gaa-inindwaa noojitoowaad Dagwaagig 2021 ge-akiiwang. Daga onendang ji-wiijiyaang ezhichigeyaang, ge-miizhiyaang giga-miigwechi’igoog Urban Shaman Gallery maagoniganing (urbanshaman.org) zhigwa imaa aabajichiganing (TBD enwaadeg) zhigwa waabanda’iweng ini miikanawan bikish ningoji. Bigo gegoo ge-miigiweng da-dagonigaade imaa izhichigewining. Ji-mawanjichigeyaang $5,000.00 minik zhooniyaa. Awiya ji-gikenimaasiwind gii-miigiwed, da-onachigaade ishkwenikaazowin ozhibii’iganens daabishkoo Jack Smith “ji-gikenimaasiwind S”maagizhaa gaa-miigiwed nawach dagakibii’ang.

Ninoonde-atoomin ge-waabanjigaadeg waabanjigewining ina? Nindaa-gichi-inendaamin. Ninandawendaamin ji-gikenjigaadeg Winnipeg zhigwa miziwekamig ini Manitoba Anishinaabe Inwewinan aabadadoon, awashime ninoonde-gikendaamin. Waabanda’iwen gaa-izhiwebiziyan miikanawaning, mazinaakiziganan imaa #speechact gemaa #healingtrails #MbIndigenousLanguages

Miigwech gaa-wiijiyaang

Thanks to Canadian Heritage – Indigenous Languages and Cultures Program – Indigenous Languages Component

The Trans Canada Trail