Ojiingewin

Omazinichigeg: PelmuSnowbird

Noongaatood Bret Parenteau

February 2021 to February 2022

Netaa-anamikodaading gegoo ji-gii-wendak, mii zhigwa gaawiin noongom izhisesinoon abooshke minwendaagosinoon. Babedaatese gaa-mazinaatesijigaadeg. Gaa-gichi-aakozing aaniish gekenjigaadeg, gaawiin gegoo ayizhisesinoon. Nawach zanagad ji-ojiindid awiya, memindage awiyag gibiingwepizowaad. Ji-maamikawiseyang aaniin ezhi- naniimaadiziyang wenji-babedaatesegin iwe, memindage nawach zanagak iwe ji-daadoodaading minik gaa-izhi-nishiwaanaajiseg.

Owe gaa-mazinaateseg ji-gikinawaajiseg iwe 1995 Bill Viola gaa-gaa-gii-ozhitood The Greeting. Owe dash PelmuSnowbird gaa-gii-ozhitood babedaateseni. Mazinaatese naawoodenaang Winnipeg bangishimong, zhigwa Mina’igoziibiing mooka’ang. Owe dash gichi-aakoziwin gaa-ayaamagak inaabanjigaade, wiinge bangang miziwekamig. Gimaamikaw gaye aaniin ge-ayaamagakipan giishin ani-ishkwaa-akiiwang, daabishkoo gaa-inaatesidoowaad iwe Hollywood gaa-mazinaatesegin odaanaang onji. Apii dash bangishimong, omaa Winnipeg, gaa-naabagaak mashkodeng, daabishkoo a’a giizis zakizang giizhig dago aanikwadoon. Gaa-mazinaatebijigaadeg mooka’ang Mina’igoziibiing, daabishkoo a’a German omazinibii’ige Matthias Grünewald, daabishkoo bebakaan gaa-inazinaategin ozhaawashkwaag, meskwaag, waabijiiyaagin maamiigaadiimagadoon aaniin iwe ge-bimaadak.

Owe eyaamagak “mamaandaawiseg”, eni-ishkwaa-akiiwang, Niin zhigwa Kris ninzaginikenidimin gagiibiingwepizowaang bakaan ezhiseg gaa-ojiinding noongom. Bezhig gaawaya’ zhigwa miigwana’ agwaniid zhigwa a’a bezhig badaka’oganan agwanii zaagaakosiningin.

Nawach zanagak ji-ojiinding gibiingwepizonan onji. Gigishkiganan ga- biizikamaang zenibaa’iigin, naangan, miskwaa ozhaawashkwaa, ozaawaa, waabishkaa gaye mii ezhi-mamigoyaasing noodining Winnipeg imaa. Mii bijiinag enaabanjigaadeg ojiiding babedaateseg gaa-mazinaatesijigaadeg i’I dinookaan. Owe gaa-mazinaateseg maamikawisem ezhi-niinamak bimaadiziwin, aaniin gaye gegoo gii-nitaa-izhichigeng nawach zanagad ji-doojigaadegiban noongom ayizhiwebak.

Aawiwid

Bakaan izhitwaawinan onjiiwag PelmuSnowbird (Theo Pelmus zhigwa Kris Snowbird), Romanian zhigwa Ojibwe-Cree dinoowag. Apane niizhowaaki niwiidanokiindimin ji-ozhitoowaang gaa-mazinaatesegin ji-nabotoowaang ini izhitwaawinan ji-ginigawinamaang. Ezhi-niizhiyaang ningagwe-mikaamin aaniin ezhi-wiijiiwiseyaang akiiwang eyaayaang. Ezhi-niizhiyaang gaye nindazhiikaamin oshki- mazinaakiziganan, mezinaatesegin gaye ji-waabanda’iweyaang.