“Giigeshimowin”

Ayizhigeng MAAGONIGANING

Kris Snowbird

“Giigeshimowin”

Lori Blondeau waa-bi-wiiji’iwed

Apii waabanda’iweng: Saturday, March 27, 2021 apii 7pm izhiseg

Maagoniganing ate minik March 1, 2022

Ekidod Omazinichige

Iwe Healing Dance gaa-ijigaadeg daabishkoo zhiibaashkode-niimiwin dago bakaan niimiwinan. Magooday iwe, biiwaabikoonsan wiimbaagin onji imaa agoodewan. Aaniin enitaagwak, aaniin ezhinaagwak niiming, mii iwe gagetin waabishiwewin. Onjida gegoo ji-noondaagwak apii mamaajiing ji-niiming. Mii-sa, ini gaa-agoodegin biiwaabikoonsan maminotaagwadoon. Aaniin ayizhitaad awiya, mii iwe bezhig noondaagwak enwaadeg. Gaa-nabagakingin ini biiwaabikoonsan aayaanikechigaadewan izhi waawiyebikoonsan, ji-gigishkigaadegin. Owe oshki-magooday, nimaamikaw naagaji’iding zhigwa giigewin. Nitam iwe zhiibaashkode niimiwin, gii-niimim ji-nanaakomindwaa enaadiziwaad zhigwa ezhi-ayaawaad ikwewag. Niibowa owe gashki’ewiziimagad magooday zhigwa niimiwin, wiijiiwese aaniish besho gidakiiminaan.

Ninga-giginiim owe oshki-magooday bekish bizindamaan aaniin enitaagwak ono biiwaabikoonsan magoodaasing gaa-agoken apii mamaajibani’owaan. Mii-sa, aaniin ezhi-mamaajiing niwiiji’igon iwe aaniin gaa-initaagwak niimiyaan, wiijiiwese aaniin enitaagwak aaniin ge-ji-izhishimong. Aaniin gaa-initaagwak ge-noondaagwak zhigwa bebakaan gegoon ge-dagotaagwakin niwiiji’igon ji-ozhitaadamaan ji-niimiyaan. Ningaachidinaanan ini enitaagwakin apii niimiyaan, daabishkoo binaakwe’owaan zhigwa dibaadodamaan iwe gete-niimiwin. Ogii-gaachitaagwadoon Theo Pelmus owe gidochigeng, ogii-maamiinotoon a’a Bret Parenteau. Apii giizhichigaadeg owe oshki-niimiwin, miinawaa gete ninga-izhi-niim ji-nanaakondamaan owe dino niimiwin. Ge-aanikeseg apii niiming, ninga-maajaa niiyaab ninga-bi-azhegiiwe biizikamaan iwe gete-zhiibaashkode magooday. Gaawiin noongom gaa-izhishimowaad ombibani’owaad, gwaakwaashkoniwaad gii-izhishimosiim. Nitam gaa-gii-izhishimong iwe niimiwin, gaawiin igii-waabandanziin mikaadan, gaan gaye ji-aazhidezideniyan, daabida bezhig gizid ji-zaamakiimagak.

Aawiwin

Eni-dazhiikang bebakaan gaa-aabadakin, omazinichige Kris Snowbird waabanda’iwe nanaandok gegoon, omazinaakiziganan zhigwa mamazinaatebijiged. Mina’igoziibiing onjii, Omashkiigoowi, Anishinaabewi gaye. 2015 gaa-akiiwang, gii-wiijiiwe imaa Foundation Mentorship Program imaa Mentoring Women for Women’s Art (MAWA) gaa-ijigaadenig, nishike-wiidanokiindiwaad gaa-niigaaniinid Natalia Lebedinskaia-wan. Apii 2016 gaa-akiiwaninig, nitam gaa-gii-ozhitood mazinaatesijigan SWEAT izhinikaadenig, igi Winnipeg Film Group’s Mosaic Women’s Film Fund ogii-diba’anaawaa.’ Apane 2016 onji, waabanda’iwem SWEAT bebakaan gaa-mamazinaatesegin, igi VUCAVU miziwekamig babaa-ayaawag waawaabanda’iwewaad daabishkoo ini 2016 Gimli Film Festival (Gimli, MB), Native Spirit Film Festival (London, England); in 2017, VIMAF (Vancouver, BC), Hot Docs, (Toronto, ON), Asinabka Film & Media Arts Festival (Ottawa, ON), St. John’s International Women’s Film Festival (St. John’s, NL), ReFrame Film Festival (Peterborough, ON), Grande rencontre des arts médiatiques en Gaspésie (Percé, QC); and in 2019 Cinéma Oblò, (Lausanne, Switzerland), Cinéma Spoutnik, (Geneva, Switzerland) and the Canadian Film Institute (Ottawa, ON). Ogii-wiijichigemaan wiijiiwaaganan Theo Pelmus a’a Snowbird endasingin ini 2015, 2016, zhigwa 2017 Winnipeg Nuit Blanche gaa-gii-izhisegin, 2017 LIVE Biennale of Performance Art (Vancouver, BC), 2018 Cluster Festival (Winnipeg).