Mide-wigwas: Transmediating

Artist(s): Niigaaniid: Angelina McLeod

Start: July 2, 2021 12:00 pm

End: August 7, 2021 5:00 pm

Galleries: Main

Ningikendaamin okwiinowang omaa gigeteminaanig odakiiwaang Agwi’idiwin Bezhig aki. Wiisaakodewininiwag owe odakiiwaan. Ningikendaamin ondinamaang nibi imaa onji Shoal Lake 40 First Nation Anishinaabeg.

IKIDOWIN

Mide-wigwas: Transmediating waabanda’iwem aaniin enwaadegin wiigwaasi-apakwaanan, wiikaanakin gikendaasongin odaanaang onji, zhigwa bakaan gegoon genawenjigaadegin daabishkoo mazinaakiziganan, mazinaatebijiganan gaye. 70 dasowaki apan, omishoomeyan Angelina McLeod James Redsky-wan, ogii-mookinaanan Midewiwin Wiigwaasan aaniin gaa-bi-izhiwebiziwaagobanen Anishinaabeg waabanong onji ningaabiiwanong izhi-maajaawaad. Bebakaan ningoji wiindamaagem owe, ono dash wiigwaasan eta gaa-wiindamaagemagakin owe gete Anishinaabeg gikendaasowin. Imaa Shoal Lake onjiiwan enawemaad Redskay, mii imaa Shoal Lake 40 (SL40) First Nation, apii 1966 gaa-akiiwang gii-adaawaage ini izhi Glenbow museum imaa Alberta megwaa imaa gaa-daawaad.

Gaa-mazinisingin gegoon imaa wiigwaasonan, dibaajimowinan, nagamonan, aadizookewinan gaye Anishinaabeg gaa-gii-bi-aanikejimowaad. Jibwaa awiyag gii-bi-dagoshinowaad omaa akiing. Owe ge-waabanda’iweng, ji-aanike-gikenjigaadeg gaa-gii-bi-midewing. Enawendiwaad McLeod wii-ganawaabandaanaawaan ini wiigwaasan ji-aanike-gikenjigaadeg. Owe ge-waabanda’iweng ji-nanaakomindwaa gigete-anishinaabebaniinag, owe dibaadodegin ono dibaajimowinan aaniin Anishinaabeg gaa-inaajimowaad.

AAWIWIN

Awe Anisinaabekwe Angelina McLeod enind, mazinaatebijige, ozhibii’ige zhigwa ganawaabamaa Shoal Lake First Nation onjiid. Giigidootamaage aki zhigwa nibi onji, gitendang wiindamaaged Obi-izhiwebiziwin Anishinaabe, odinwewin, odizhtwaawin gaye. Onandooshkaanan Midewi-wiigwaasan gaa-gii-ganawendaminid omishoomeyan James Redsky-wan. Gii-miigaazod imaa WW1 gaa-ijigaadeg, gii-midewid, ogii-aanikanootaanan ini wiigwaasan izhi imaa Glenbow Museum imaa Calgary ji-ganawenjigaadegin. Megwaa odazhiikaanan Angelina mazinaatebijganan onji ini National Film Board ji-dadibaadodang Shoal Lake 40, First Nation, aandi wendinamowaad nibi Winnipeg eyaawaad.

Miigwech inaa’ Jessica Jacobson-Konefall zhigwa Daina Warren owe izhichigewin onji.

Aanind gii-diba’igaade onji Canada Council for the Arts and the Social Sciences and Humanities Research Council of Canada gaa-inindwaa.

Urban Shaman: Contemporary Aboriginal Art Gallery onanaakomaawaa’ gii-wiiji’igowaad, ningowaki aazha, gaa-wiijiiwaaganiyaang, ezhi-daayaang, enawemangwaa gaye, NCI FM, CAHRD, Winnipeg Foundation, Manitoba Heritage, the Winnipeg Arts Council, the Manitoba Arts Council, the Canada Council for the Arts zhigwa University of Manitoba School of Art. ~Miigwetch/ Hai Hai/ Ekosi / Merci/ Thank you