Ełexiìtǫ ; Ehts’ǫǫ̀ / Aanike-ayaam, ginaniishike-ayaamin

Ełexiìtǫ ; Ehts’ǫǫ̀ / Aanike-ayaam, ginaniishike-ayaamin

Omazinichige Casey Koyczan

Apii ge-izhiseg: April 30 akoo May 29, 2021

Ekidod Omazinichige

“Ełexiìtǫ ; Ehts’ǫǫ̀ gegoo gii-achigaade ji-wiindamaagemagak aaniin awiya ji-izhi-gikendang odizhitwaawin maagonigan aabajitood ji-andooshkang, aayaabajitood gegoowan ji-wiiji’igod ji-ani-gikendang odinwewin, odaanaang odizhitwaawin, dibaajimowinan zhigwa aaniin ji-gii-izhi-debwetangiban.

Apii gii-niizhwaaso-apiitiziyaan gii-nagadamaan nindoodenaam Yellowknife, ningii-ani-wanitoon nindizhitwaawin; miziwe ningaabiiwanong omaa Canada ningii-bimi-ayaa, nanaandok awiyag ningii-nagishkawaag, nanaandok gaye ningii-ayizhiwebiz. Bakaan onji niiji-denemag ningii-ayaa zhigwa nindinwewin gaye. Minik gaa-babimaadiziyaan, naanigoding ningii-azhegiiwe aandi wenjiiyaan imaa Northwest Territories akiing. Bebangii ningii-ani-gagikendaan aweneniwiyaang Dene dinoowiyaang, aaniin gaye ayizhtwaayaang, nagamonan, ezhi-debwetamaang, waawiikaa dash iwe gii-ayizhise. Eni-gichi-ayaayaan, ningii-ani-gikendaan aaniin ezhi-gitendaagwak ji-gikendamaambaan nindizhitwaawin minik gegoo gaa-gii-gikino’amaagoowaan, aaniin gaye ji-aabajitoowaan gegoon iwe onji. Aanagi-zanagak, aanind gegoon ningii-wiiji’igonan bigo imaa eyaayaan:

• Biminizha’an aaniin gakina awesi ji-aabaji’adiban. Owe mazinichigeyaan, gakina gegoo gaa-gii-maawandoonigaadeg nindaabajitoon, gaan gegoo webinigaadesinoon, gakina gegoon gegoo izhi-aabadadoon.
• Bagijigan ji-atoowaan apii gegoo akiing ondinamaan, babimi-ayaayaan zhigwa mawadisagwaa gekenimagwaa, enawenimagwaa gaye.

• Onjida ji-ganooniding; memindage waawaasa ayaang gemaa awiyag zaagi’adwaa, zhawenimadwaa.
• Anamitoon, minjimendan gaye Dene awiyag odibaajimowiniwaan, odaadizookaaniwaan gaye; mii owe igo wenji-dazhiikaman ozhichiganan, noondaagomotoowinan, mazinaatebijiganan zhigwa ini 3D/VR/XR gaa-ijigaadegin.

• Aaniin memindage enitaagwakin ninagamoninaanan; gagaana aaniish ginibiiwimin, awashime baswewesin, nawach minose besho ji-wiijichigemangidwaa odaanaang gidaanikoobijiganinaanig.

• Weweni bizindan inwewin onji Medicine Wheel wenjisegin gikina’amaagewinan; bebakaan iwe ijigaade omaa Mikinaako-minisiing, wiiji’iwemagak bebakaan onji awiya izhitwaawining ji-gikendang bakaan izhitwaawinan. Niiwin misan endaso-wiikweyaang wiindamaagemagad niiwewig enaakonigeng, gekino’amaageng aaniin gaye enazinaazod a’a Medicine Wheel.

• Gaawiin wiin owe nindenewisii, gaawiin aaniish iwe nindizhi-giigidosii; bebakaan gaa-gii-izhiwebiziyaan ningii-zanagi’igon weweni ji-gikendamaan nindinwewin. Ji-izhi-giigidowaan iwe Tlicho inwewin minik ge-ani-bimaadiziyaan ninga-ani-noojitoon. Gaawiin gaye onzaam wiikaa ji-gikendang awiya odinwewin.

• Gagagwejitoong gegoon wiiji’iwese; oko-aabajitoong bebakaan gegoon aabajichiganan aaniin gaye ji-izhi-wiiji’igoowan aaniin ge-izhitooyaambaan, wiiji’ise izhitwaawin, debwetaman, gidizhichigewinan gaye.

• Enigok anokiin, maanaaji’idig; megwaa ani-ombigiyaan, niniigi’igoog niigaan ogii-atoonaawaa’ anokiiwin zhigwa ji-manaaji’idid awiya.

• Biminizha’an “Dene Onaakonigewinan”. Jibwaa igo gichi-ayaayaan, ningii-gagwe-biminizha’aanan ono onaakonigewinan. Aanagi bakaan gegoo ningii-migoshkaaji’igonan bemaadiziyaan, ningagwe-azhegiiwe ini onaakonigewinan, ningii-wiiji’igonan aaniish niiyaab Dene ji-inaadiziyaan aaniin enaadiziwaajin:

** Waawiiji’idig
**Bakweningen eyaayan.
**Mino-doodoo awiya, gegoo gaye gikaamaaken awiya.
**Debikag nibaan, giizhigak anokiin.
**Manaaji’ getaadiziwaad, zhigwa gakina gegoo eyaamagak.
**Abinoojiiyag gwayak ji-manaaji’idiwaad.
**Gagwe-zaagi’idig ezhi-gashkitooyeg igo.
**Gagwe-minwendan minik igo ezhi-gashkitoowan.

**Aanike-gikinoa’maagen gegoon.

Gaa-agoodegin misan daabishkoo aaniin ayizhiwebak ezhi-wiijiiweseyang gegoon akiing eyaamagak. Aaniin enitaagwak onji imaa mitigong awenenag goda genawaabandamowaad aandi gaye niibawiwaad, mii iwe wiiji’iweseg mikigaadeg izhitwaawin. Nanaandok enitaagozid Dene dewe’igan, waasigani-gidochiganan zhigwa odaanaang ina’amaazowinan, mii iwe noondaagwak apii awiyag babaamosewaad imaa zhigwa mikawiwaad gewiinawaa. Aaniin enaabanda’iweng ini Dene onaakonigewinan, aaniin bebakaan ezhi-inwaadegin ji-wiikoshkaad awiya ji-gikendaasod, ji-naanaagadawendang zhigwa ji-gikendangiban aawiwigwen.

Thank You / Mahsi Cho, Casey Koyczan

Aawiwid Omazinichige

Izhitwaawin, gaa-aabadakin zhigwa gechiwaag wiijiiwesegin dagwiimagadoon giwiiji-bimaadiziwinaang. Endaso-giizhig gigagwejitoomin gigetediziiminaanig gaa-gii-gikina’amaagewaad bekish gikendamang bebakaan gegoon aabadakin ozhiimagadoon endasowaki. Gigii-ani-gashkitoomin aaniin ji-izhi-aabajitooyang ono gaa-aabadakin giwiiji’igomin aandi gaa-bi-onjiiyang, aawiwiyang aaniin gaye ge-ani-izhi-ayaayang ani-niigaan.

Awe Casey Koyczan omazinichige, Tlicho Dene dinoowi, Yellowknife, NT onji, bebakaan gegoon odaabajitoonan gaa-aabadakin ji-dagonan izhitwaawin, zhigwa gaye nanaandok gegoon gechiwaag zhigwa miziwe izhichigewinan bemaadiziyang omaa akiing. Aanind owe izhichigewin gaa-achigaadeg, akiing onji gegoon aabadadoon, niiyaab akiing gegoon eyaamagakin ji-ozhii’oomagakin. Ani-niigaan gegoon ge-ani-izhisegwen onjisemagadoon aaniin ezhi-ozhichigaadegin ono gaa-aabadakin daabishkoo VR/360/XR weweni igo ji-moozhichigaadeing aaniin ayizhi-ayaamagakin.

Miziwekamig gikenimaa a’a omazinichige, miziwe gaye gii-daa, gii-waabanda’iwe gegoon, maamawiinong, wiijichigemaad awiya’ onji Finland, Colombia, Chile, Mexico, ini Netherlands, zhigwa UK gaa-ijigaadegin akiin. Dago gaye gidochige, bebakaan odoozhitoonan gegoon daabishkoo mazinaateshijiged, ozhibii’iged, gikino’amaaged, mazinibii’iged, maagonigan anokaadang, giigidootamawaad ani-niigaan omazinichige zhigwa ogidochige.

Odayaan mazina’igan gii-giizhitood bebakaan gegoon waabanda’iwemagakin onji Lethbridge College, iwe Bachelor of Fine Arts mazina’igan onji Thompson Rivers University apii ani-giizhitood iwe Masters of Fine Arts mazina’igan imaa onji University of Manitoba gichi-gikino’amaadiiwigamigong.

https://www.caseykoyczan.com/
IG: caseykoyczanart

A personal Thank You / Mahsi Cho from Casey to University of Manitoba – School of Art, and MFA advisor Lori Blondeau, Chris Pancoe, Mahsa Merci, Hye Yeon Shin, Julianna Zwierciadlowska-Rhymer and Daina Warren – Director of Urban Shaman Gallery