BUFFY SAINTE-MARIE, mêskanâs kâ-miskahk: ka-kanawâpahtamihk mâwacihcikêwin kâ-pê-isi-naspitêyihtahk tâpasinahikêwin
BUFFY SAINTE-MARIE, ᒣᐢᑲᓈᐢ ᑳ ᒥᐢᑲᕽ: ᑲ ᑲᓇᐚᐸᐦᑕᒥᕽ ᒫᐘᒋᐦᒋᑫᐏᐣ ᑳ ᐯ ᐃᓯ ᓇᐢᐱᑌᔨᐦᑕᕽ ᑖᐸᓯᓇᐦᐃᑫᐏᐣ
kîkway kâ-nôkwahk ôta
Buffy Sainte-Marie kî-ati-atoskâtasm naspitêyihtamowin âpacihcikana pêyakwan iai kâ-kî-pê-atoskâtahk kahkiyaw osîhcikêwina – kî-tawatahikêw omamahtâwisiwin ohci. kiskisi 1984 askîwin – êkospîhk êkâ mwâsi ê-pêhtamihk misiwêskamik-ayapiy êkwa mîkiwâmihk ohci mamâhtâwi-âpacihcikana kêtisk awiyak ê-kî-âpacihtât – êkota Buffy kî-osîhtâw ôhi mâwacihcikêwina âta apisîs piko âpacihcikana ê-kî-ihtakohki tâpiskôc MacPaint anihi Macintosh. namôya mistahi kî-ihtakwan wîcihiwêwina mamâhtâwi-âpacihcikana ohci tâpiskôc anohc ôhi naspitêyihtamowina êkwa piko kî-âpatanwa ta-atâwâkêhk piko kîkway ohci namôya kî-âpatanwa naspitêyihtamowin tâpasinahikêwina ohci. nama kî-ihtakona kwayâc-wîcihiwêwin ahpô ka-asastâniwiki tâpasinahikêwina, ohcitaw piko pah-pêyahtak ta-osîhcikêt otâpasinahikêw, ta-sîpêyihtahkik. kî-sâkohtâw anihi kâ-wî-wanâhokot, êkâ cêskwa ê-kî-ihtakohk wîcihiwêwin, kî-kocîhtâw ta-tâpasinahikêt êkota mamâhtâwi-âpacihcikan ê-âpacihtât, tâpiskôc awiyak pêyahktak kâ-mîkisihkâcikêt ahpô awiyak pimiy ohci ê-masinipêhikâkêt. kî-kakâyawâtisiw ê-kikinahk nanâtohk pîtos naspisîhcikana mîna tâpasinahikêwina, mîna asapâpak, pîwaya, mîkwanak, êkwa mîkisak, Buffy kî-osîhtâw ôhi naspitêyihtamowin tâpasinahikêwin ê-mamahtâwisihcikêt pêyakwan otâtayohkêw. êwakoni ôhi kâ-wâpahtamihk mîna kâ-mâmitonêyihtamihk mâmawihcikêwin kâ-miyonâkwahki mêtoni nîkânîstamâkêw.
ᑮᑿᐩ ᑳ ᓅᑿᕽ ᐆᑕ
Buffy Sainte-Marie ᑮ ᐊᑎ ᐊᑐᐢᑳᑕᐢᒼ ᓇᐢᐱᑌᔨᐦᑕᒧᐏᐣ ᐋᐸᒋᐦᒋᑲᓇ ᐯᔭᑿᐣ iai ᑳ ᑮ ᐯ ᐊᑐᐢᑳᑕᕽ ᑲᐦᑭᔭᐤ ᐅᓰᐦᒋᑫᐏᓇ – ᑮ ᑕᐘᑕᐦᐃᑫᐤ ᐅᒪᒪᐦᑖᐏᓯᐏᐣ ᐅᐦᒋ᙮ ᑭᐢᑭᓯ 1984 ᐊᐢᑮᐏᐣ – ᐁᑯᐢᐲᕽ ᐁᑳ ᒹᓯ ᐁ ᐯᐦᑕᒥᕽ ᒥᓯᐍᐢᑲᒥᑲᔭᐱᐩ ᐁᑿ ᒦᑭᐚᒥᕽ ᐅᐦᒋ ᒪᒫᐦᑖᐏ ᐋᐸᒋᐦᒋᑲᓇ ᑫᑎᐢᐠ ᐊᐏᔭᐠ ᐁ ᑮ ᐋᐸᒋᐦᑖᐟ – ᐁᑯᑕ Buffy ᑮ ᐅᓰᐦᑖᐤ ᐆᐦᐃ ᒫᐘᒋᐦᒋᑫᐏᓇ ᐋᑕ ᐊᐱᓰᐢ ᐱᑯ ᐋᐸᒋᐦᒋᑲᓇ ᐁ ᑮ ᐃᐦᑕᑯᐦᑭ ᑖᐱᐢᑰᐨ MacPaint ᐊᓂᐦᐃ Macintosh. ᓇᒨᔭ ᒥᐢᑕᐦᐃ ᑮ ᐃᐦᑕᑿᐣ ᐑᒋᐦᐃᐍᐏᓇ ᒪᒫᐦᑖᐏ ᐋᐸᒋᐦᒋᑲᓇ ᐅᐦᒋ ᑖᐱᐢᑰᐨ ᐊᓄᐦᐨ ᐆᐦᐃ ᓇᐢᐱᑌᔨᐦᑕᒧᐏᓇ ᐁᑿ ᐱᑯ ᑮ ᐋᐸᑕᓌ ᑕ ᐊᑖᐚᑫᕽ ᐱᑯ ᑮᑿᐩ ᐅᐦᒋ ᓇᒨᔭ ᑮ ᐋᐸᑕᓌ ᓇᐢᐱᑌᔨᐦᑕᒧᐏᐣ ᑖᐸᓯᓇᐦᐃᑫᐏᓇ ᐅᐦᒋ᙮ ᓇᒪ ᑮ ᐃᐦᑕᑯᓇ ᑿᔮᐨ ᐑᒋᐦᐃᐍᐏᐣ ᐊᐦᐴ ᑲ ᐊᓴᐢᑖᓂᐏᑭ ᑖᐸᓯᓇᐦᐃᑫᐏᓇ, ᐅᐦᒋᑕᐤ ᐱᑯ ᐸᐦ ᐯᔭᐦᑕᐠ ᑕ ᐅᓰᐦᒋᑫᐟ ᐅᑖᐸᓯᓇᐦᐃᑫᐤ, ᑕ ᓰᐯᔨᐦᑕᐦᑭᐠ᙮ ᑮ ᓵᑯᐦᑖᐤ ᐊᓂᐦᐃ ᑳ ᐑ ᐘᓈᐦᐅᑯᐟ, ᐁᑳ ᒉᐢᑿ ᐁ ᑮ ᐃᐦᑕᑯᕽ ᐑᒋᐦᐃᐍᐏᐣ, ᑮ ᑯᒌᐦᑖᐤ ᑕ ᑖᐸᓯᓇᐦᐃᑫᐟ ᐁᑯᑕ ᒪᒫᐦᑖᐏ ᐋᐸᒋᐦᒋᑲᐣ ᐁ ᐋᐸᒋᐦᑖᐟ, ᑖᐱᐢᑰᐨ ᐊᐏᔭᐠ pêyahktak ᑳ ᒦᑭᓯᐦᑳᒋᑫᐟ ᐊᐦᐴ ᐊᐏᔭᐠ ᐱᒥᐩ ᐅᐦᒋ ᐁ ᒪᓯᓂᐯᐦᐃᑳᑫᐟ᙮ ᑮ ᑲᑳᔭᐚᑎᓯᐤ ᐁ ᑭᑭᓇᕽ ᓇᓈᑐᕽ ᐲᑐᐢ ᓇᐢᐱᓰᐦᒋᑲᓇ ᒦᓇ ᑖᐸᓯᓇᐦᐃᑫᐏᓇ, ᒦᓇ ᐊᓴᐹᐸᐠ, ᐲᐘᔭ, ᒦᑿᓇᐠ, ᐁᑿ ᒦᑭᓴᐠ, Buffy ᑮ ᐅᓰᐦᑖᐤ ᐆᐦᐃ ᓇᐢᐱᑌᔨᐦᑕᒧᐏᐣ ᑖᐸᓯᓇᐦᐃᑫᐏᐣ ᐁ ᒪᒪᐦᑖᐏᓯᐦᒋᑫᐟ ᐯᔭᑿᐣ ᐅᑖᑕᔪᐦᑫᐤ᙮ ᐁᐘᑯᓂ ᐆᐦᐃ ᑳ ᐚᐸᐦᑕᒥᕽ ᒦᓇ ᑳ ᒫᒥᑐᓀᔨᐦᑕᒥᕽ ᒫᒪᐏᐦᒋᑫᐏᐣ ᑳ ᒥᔪᓈᑿᐦᑭ ᒣᑐᓂ ᓃᑳᓃᐢᑕᒫᑫᐤ᙮
tâpasinahikêw mâmiskôtamowina:
ᑖᐸᓯᓇᐦᐃᑫᐤ ᒫᒥᐢᑰᑕᒧᐏᓇ:
ayahuasca Jaguar 1 and 2 kêhtê-pisiw 1 êkwa 2: kisâstaw pêyakwan Klimt otâpasinahikêwina ê-isinâkwahk oma, nanâtohk itasinâsowina masinipayihâwak iskwêw êkwa kêhtê-pisiw, kiskiwêhowin kâ-isi-sôhkahk pikwac-âyihk. otâpasinahikêw ay-apiw, êkâ ê-mikoskâtêyihtahk kâ-isi-âyimaniyik owâsakâ-pâtos-âyihk, ê-ohpît kîskwêwinihk ohci êkwa ê-sêsâwipayit otâhtisîhcikêwinihk. kâ-ayât êkota kêhtê-pisîsis êkwa kâ-isi-sôhkaniyik otâniskômohcikaniwâw nôkwaniyiw Ayahuasca otâpahkawisiwin.
ayahuasca Jaguar 1 and 2 ᑫᐦᑌ ᐱᓯᐤ 1 ᐁᑿ 2: ᑭᓵᐢᑕᐤ ᐯᔭᑿᐣ Klimt ᐅᑖᐸᓯᓇᐦᐃᑫᐏᓇ ᐁ ᐃᓯᓈᑿᕽ ᐅᒪ, ᓇᓈᑐᕽ ᐃᑕᓯᓈᓱᐏᓇ ᒪᓯᓂᐸᔨᐦᐋᐘᐠ ᐃᐢᑵᐤ ᐁᑿ ᑫᐦᑌ ᐱᓯᐤ, ᑭᐢᑭᐍᐦᐅᐏᐣ ᑳ ᐃᓯ ᓲᐦᑲᕽ ᐱᑿᒑᔨᕽ᙮ ᐅᑖᐸᓯᓇᐦᐃᑫᐤ ᐊᔭᐱᐤ, ᐁᑳ ᐁ ᒥᑯᐢᑳᑌᔨᐦᑕᕽ ᑳ ᐃᓯ ᐋᔨᒪᓂᔨᐠ ᐅᐚᓴᑳ ᐹᑐᓵᔨᕽ, ᐁ ᐅᐦᐲᐟ ᑮᐢᑵᐏᓂᕽ ᐅᐦᒋ ᐁᑿ ᐁ ᓭᓵᐏᐸᔨᐟ ᐅᑖᐦᑎᓰᐦᒋᑫᐏᓂᕽ᙮ ᑳ ᐊᔮᐟ ᐁᑯᑕ ᑫᐦᑌ ᐱᓰᓯᐢ ᐁᑿ ᑳ ᐃᓯ ᓲᐦᑲᓂᔨᐠ ᐅᑖᓂᐢᑰᒧᐦᒋᑲᓂᐚᐤ ᓅᑿᓂᔨᐤ Ayahuasca ᐅᑖᐸᐦᑲᐏᓯᐏᐣ᙮
Elder Brothers (ostêsimâwak): manitow-ihtâwin pêyakwan, Buffy kihcêyimêw L.A. Huffmana 1881 askîwin ispîhk kâ-kî-masinipayihwât nîso iyini-nâpêwa kisâstaw ê-nôkosiyit anohc nanâtohk naspitêyihtamowin askîhk. ê-kî-waskawihikot opimâtisiwiniwâw kâ-kî–mêkwâ-tâpasinahahk ôma tâpasinahikêwin, Sainte-Marie kî-kistêyimêw ispîhk kâ-masinipayihât kihiwîkwana ta-miciminâyit. pêyak nâpêw miciminêw kiskinwêhonâhtikwa, ê-wawêsîhk kihiwîkwana ohci, êkwa ana kotak miciminêw kâ-masinipayit wêwêstêhamân kâ-kî-miyikot ayahcîyiniw kêhtê-aya, Ed Calf Robe, ê-kihcêyimât Buffy ita kâ-ohcît.
Elder Brothers (ᐅᐢᑌᓯᒫᐘᐠ): ᒪᓂᑐᐏᐦᑖᐏᐣ ᐯᔭᑿᐣ, Buffy ᑭᐦᒉᔨᒣᐤ L.ᐊ᙮ Huffmana 1881 ᐊᐢᑮᐏᐣ ᐃᐢᐲᕽ ᑳ ᑮ ᒪᓯᓂᐸᔨᐦᐚᐟ ᓃᓱ ᐃᔨᓂ ᓈᐯᐘ ᑭᓵᐢᑕᐤ ᐁ ᓅᑯᓯᔨᐟ ᐊᓄᐦᐨ ᓇᓈᑐᕽ ᓇᐢᐱᑌᔨᐦᑕᒧᐏᐣ ᐊᐢᑮᕽ᙮ ᐁ ᑮ ᐘᐢᑲᐏᐦᐃᑯᐟ ᐅᐱᒫᑎᓯᐏᓂᐚᐤ ᑳ ᑮ–ᒣᒁ ᑖᐸᓯᓇᐦᐊᕽ ᐆᒪ ᑖᐸᓯᓇᐦᐃᑫᐏᐣ, Sainte-Marie ᑮ ᑭᐢᑌᔨᒣᐤ ᐃᐢᐲᕽ ᑳ ᒪᓯᓂᐸᔨᐦᐋᐟ ᑭᐦᐃᐑᑿᓇ ᑕ ᒥᒋᒥᓈᔨᐟ᙮ ᐯᔭᐠ ᓈᐯᐤ ᒥᒋᒥᓀᐤ ᑭᐢᑭᓊᐦᐅᓈᐦᑎᑿ, ᐁ ᐘᐍᓰᕽ ᑭᐦᐃᐑᑿᓇ ᐅᐦᒋ, ᐁᑿ ᐊᓇ ᑯᑕᐠ ᒥᒋᒥᓀᐤ ᑳ ᒪᓯᓂᐸᔨᐟ ᐍᐍᐢᑌᐦᐊᒫᐣ ᑳ ᑮ ᒥᔨᑯᐟ ᐊᔭᐦᒌᔨᓂᐤ ᑫᐦᑌ ᐊᔭ, Ed Calf Robe, ᐁ ᑭᐦᒉᔨᒫᐟ Buffy ᐃᑕ ᑳ ᐅᐦᒌᐟ᙮
Fallen Angels (ê-nîhcipayicik okîsikowak): ôta ka-itwêstamâkêhk kâ-kihcêyimiht âkayâsîwiyiniw omasinipayihcikêw, Simon Fowler’s omasinipêhowêwin – nistam ê-nôkwahk anita kitohcikan-wâwiyêsihk “Coincidence and Likely Stories” (EMI Records, 1990) kî-sôhki-atoskâtam ê-tâhkohtastât mîna ê-wâpamonastât kâ-pêyakot iyiniw masinipayiwinihk ê-nîsohkêt, wiya ka-nôkosit. kâ-astât kihci-kîsik wâwêyês êkwa wâsê-wâpâstêwa tâpiskôc ê-kitâpamiht awiyak nanâtohk-isi ê-nâh-nîmit. nistam ê-isiyihkâtêk ‘nîsôtêwiwak’ êwako ôma naspisîhcikan isinâkwan pêyakwanohk piko ta-wâpahtamihk, piko pêyakwan isi ka-kitâpamisot onîsôtêma wiya okitohcikêw.
Fallen Angels (ᐁ ᓃᐦᒋᐸᔨᒋᐠ ᐅᑮᓯᑯᐘᐠ): ᐆᑕ ᑲ ᐃᑘᐢᑕᒫᑫᕽ ᑳ ᑭᐦᒉᔨᒥᐦᐟ ᐋᑲᔮᓰᐏᔨᓂᐤ ᐅᒪᓯᓂᐸᔨᐦᒋᑫᐤ, ᓯᒧᐣ Fowler’s ᐅᒪᓯᓂᐯᐦᐅᐍᐏᐣ – ᓂᐢᑕᒼ ᐁ ᓅᑿᕽ ᐊᓂᑕ ᑭᑐᐦᒋᑲᐣ ᐚᐏᔦᓯᕽ “Coincidence and Likely Stories” (EMI Records, 1990) ᑮ ᓲᐦᑭ ᐊᑐᐢᑳᑕᒼ ᐁ ᑖᐦᑯᐦᑕᐢᑖᐟ ᒦᓇ ᐁ ᐚᐸᒧᓇᐢᑖᐟ ᑳ ᐯᔭᑯᐟ ᐃᔨᓂᐤ ᒪᓯᓂᐸᔨᐏᓂᕽ ᐁ ᓃᓱᐦᑫᐟ, ᐏᔭ ᑲ ᓅᑯᓯᐟ᙮ ᑳ ᐊᐢᑖᐟ ᑭᐦᒋ ᑮᓯᐠ ᐚᐍᔦᐢ ᐁᑿ ᐚᓭ ᐚᐹᐢᑌᐘ ᑖᐱᐢᑰᐨ ᐁ ᑭᑖᐸᒥᐦᐟ ᐊᐏᔭᐠ ᓇᓈᑐᐦᑭᓯ ᐁ ᓈᐦ ᓃᒥᐟ᙮ ᓂᐢᑕᒼ ᐁ ᐃᓯᔨᐦᑳᑌᐠ ‘ᓃᓲᑌᐏᐘᑭ ᐁᐘᑯ ᐆᒪ ᓇᐢᐱᓰᐦᒋᑲᐣ ᐃᓯᓈᑿᐣ ᐯᔭᑿᓄᕽ ᐱᑯ ᑕ ᐚᐸᐦᑕᒥᕽ, ᐱᑯ ᐯᔭᑿᐣ ᐃᓯ ᑲ ᑭᑖᐸᒥᓱᐟ ᐅᓃᓲᑌᒪ ᐏᔭ ᐅᑭᑐᐦᒋᑫᐤ᙮
Fifi the Cat (Fifi minôs): itisinâsowin êkwa pâh-pîtos-itasinâsowin ohci, kâkikê ka-pimâtisihiht kâ-âh-astât ominôsima oskîsikwa masninpayiwin, Buffy kihcêyimêw kâ-sâkihât ominôsima, owîcêwâkana.
Fifi the Cat (Fifi ᒥᓅᐢ): ᐃᑎᓯᓈᓱᐏᐣ ᐁᑿ ᐹᐦ ᐲᑐᓯᑕᓯᓈᓱᐏᐣ ᐅᐦᒋ, ᑳᑭᑫ ᑲ ᐱᒫᑎᓯᐦᐃᐦᐟ ᑳ ᐋᐦᐊᐢᑖᐟ ᐅᒥᓅᓯᒪ ᐅᐢᑮᓯᑿ ᒪᐢᓂᐣᐸᔨᐏᐣ, Buffy ᑭᐦᒉᔨᒣᐤ ᑳ ᓵᑭᐦᐋᐟ ᐅᒥᓅᓯᒪ, ᐅᐑᒉᐚᑲᓇ᙮
Forced to Dance (kî-itâw ohcitaw piko ta-nîmihtot): pêyakwan ispîhk ê-kî-âcimot ê-kî-tâpasinahahk ôma tâpasinahiokêwin kî-mâci-âpacihtâw MacPaint êkwa ê-ati-taswênahk kâ-pê-askîwik ispîhk nawac ê-miywâsiki nanâtohk âpacihcikan ta-miyo-itasinâstêsihcikêhk. nâspitê-masinistahikêwin ôma êmasinipayit otâpasinahikêw ê-pimahkamikisit ita maci-nâpêwa ê-âh-ispihcimisoyit nâpêwi-wiyasiwêwinihk. âta ê-wâh-wîcêwitohk osôhkâtisiwiniwâw tâpiskôc ê-nôhtê-wanâhikot mîna ê-nôhtê-tipêyimikot, pikwâci-âyihk ocapihkêsa, kôhkominâkêsîs, kâmwâci-atoskêw ta-âpahahk ocihciya êkwa ta-pakitinât ta-osîhtâyit otâpwêwin.
Forced to Dance (ᑮ ᐃᑖᐤ ᐅᐦᒋᑕᐤ ᐱᑯ ᑕ ᓃᒥᐦᑐᐟ): ᐯᔭᑿᐣ ᐃᐢᐲᕽ ᐁ ᑮ ᐋᒋᒧᐟ ᐁ ᑮ ᑖᐸᓯᓇᐦᐊᕽ ᐆᒪ tâpasinahiokêwin ᑮ ᒫᒋ ᐋᐸᒋᐦᑖᐤ MacPaint ᐁᑿ ᐁ ᐊᑎ ᑕᓷᓇᕽ ᑳ ᐯ ᐊᐢᑮᐏᐠ ᐃᐢᐲᕽ ᓇᐘᐨ ᐁ ᒥᔼᓯᑭ ᓇᓈᑐᕽ ᐋᐸᒋᐦᒋᑲᐣ ᑕ ᒥᔪ ᐃᑕᓯᓈᐢᑌᓯᐦᒋᑫᕽ᙮ ᓈᐢᐱᑌ ᒪᓯᓂᐢᑕᐦᐃᑫᐏᐣ ᐆᒪ ᐁᒪᓯᓂᐸᔨᐟ ᐅᑖᐸᓯᓇᐦᐃᑫᐤ ᐁ ᐱᒪᐦᑲᒥᑭᓯᐟ ᐃᑕ ᒪᒋ ᓈᐯᐘ ᐁ ᐋᐦᐃᐢᐱᐦᒋᒥᓱᔨᐟ ᓈᐯᐏ ᐏᔭᓯᐍᐏᓂᕽ᙮ ᐋᑕ ᐁ ᐚᐦ ᐑᒉᐏᑐᕽ ᐅᓲᐦᑳᑎᓯᐏᓂᐚᐤ ᑖᐱᐢᑰᐨ ᐁ ᓅᐦᑌ ᐘᓈᐦᐃᑯᐟ ᒦᓇ ᐁ ᓅᐦᑌ ᑎᐯᔨᒥᑯᐟ, ᐱᒁᒋ ᐋᔨᕽ ᐅᒐᐱᐦᑫᓴ, ᑰᐦᑯᒥᓈᑫᓰᐢ, ᑳᒹᒋ ᐊᑐᐢᑫᐤ ᑕ ᐋᐸᐦᐊᕽ ᐅᒋᐦᒋᔭ ᐁᑿ ᑕ ᐸᑭᑎᓈᐟ ᑕ ᐅᓰᐦᑖᔨᐟ ᐅᑖᐻᐏᐣ᙮
Hands: the coming of the digital age (micihciya: kâ-pê-ihtakohk nâspitêyihtamowin): êkota ôma tâpasinahamâsowin masinipayin ê-otinahk otâpasinahikêw ê-otihtikot pâh-pahki-askiy, ê-sîtoskahk kâ-pê-sôhkaniyik nâspitêyihtamowin kahkiyaw kâ-wî-mikoskâcihikoyahk. kâ-pâh-pîtosayâk êkwa kâ-sisiwêyâk masinipayin tâpiskôc mistikwânikan ê-isinâkwahk naspisîhcikan, êwak ôma ê-masinipayihtât iyiniw-pimâtisiwin. ôta isiniskêstamowinihk nôkohtâw môsihtâwin êkwa ê-otinamihk katawasisiwin, sôhkâtisiwin êkwa êkâ kâ-nôkwahk cêskwa ôma oski-tâpasinahikêwin. ôma naspisîhcikêwin nistam kî-wâpahcikâtêw anita Emily Carr College of Fine Art Vancouverihk pâskâwihowipîsim ê-kî-akimiht, 1994 askîwin ê-ispayik ê-kiskinawâcihtâhk anima Pixel Pushers Exhibit of Digital Art.
Hands: the coming of the digital age (ᒥᒋᐦᒋᔭ: ᑳ ᐯ ᐃᐦᑕᑯᕽ ᓈᐢᐱᑌᔨᐦᑕᒧᐏᐣ): ᐁᑯᑕ ᐆᒪ ᑖᐸᓯᓇᐦᐊᒫᓱᐏᐣ ᒪᓯᓂᐸᔨᐣ ᐁ ᐅᑎᓇᕽ ᐅᑖᐸᓯᓇᐦᐃᑫᐤ ᐁ ᐅᑎᐦᑎᑯᐟ ᐹᐦ ᐸᐦᑭ ᐊᐢᑭᐩ, ᐁ ᓰᑐᐢᑲᕽ ᑳ ᐯ ᓲᐦᑲᓂᔨᐠ ᓈᐢᐱᑌᔨᐦᑕᒧᐏᐣ ᑲᐦᑭᔭᐤ ᑳ ᐑ ᒥᑯᐢᑳᒋᐦᐃᑯᔭᕽ᙮ ᑳ ᐹᐦ ᐲᑐᓴᔮᐠ ᐁᑿ ᑳ ᓯᓯᐍᔮᐠ ᒪᓯᓂᐸᔨᐣ ᑖᐱᐢᑰᐨ ᒥᐢᑎᒁᓂᑲᐣ ᐁ ᐃᓯᓈᑿᕽ ᓇᐢᐱᓰᐦᒋᑲᐣ, ᐁᐘᐠ ᐆᒪ ᐁ ᒪᓯᓂᐸᔨᐦᑖᐟ ᐃᔨᓂᐤ ᐱᒫᑎᓯᐏᐣ᙮ ᐆᑕ ᐃᓯᓂᐢᑫᐢᑕᒧᐏᓂᕽ ᓅᑯᐦᑖᐤ ᒨᓯᐦᑖᐏᐣ ᐁᑿ ᐁ ᐅᑎᓇᒥᕽ ᑲᑕᐘᓯᓯᐏᐣ, ᓲᐦᑳᑎᓯᐏᐣ ᐁᑿ ᐁᑳ ᑳ ᓅᑿᕽ ᒉᐢᑿ ᐆᒪ ᐅᐢᑭ ᑖᐸᓯᓇᐦᐃᑫᐏᐣ᙮ ᐆᒪ ᓇᐢᐱᓰᐦᒋᑫᐏᐣ ᓂᐢᑕᒼ ᑮ ᐚᐸᐦᒋᑳᑌᐤ ᐊᓂᑕ Emily Carr College of Fine Art Vancouverihk ᐹᐢᑳᐏᐦᐅᐏᐲᓯᒼ ᐁ ᑮ ᐊᑭᒥᐦᐟ, 1994 ᐊᐢᑮᐏᐣ ᐁ ᐃᐢᐸᔨᐠ ᐁ ᑭᐢᑭᓇᐚᒋᐦᑖᕽ ᐊᓂᒪ Pixel Pushers Exhibit of Digital Art.
Neon Hula: (nanâtohk-itasinâsowin wâwiyês): nanâtohk-itasinâsowin wâwiyês masinipayihtam ê-waskawîcik nisto onîmihitowak ê-miyo-itasinâsocik; wêstakayiwâwa kihcinâkwana ê-sîpihkwâyiki, ê-wêpahki pêyakwan isi owatihkwana mistikwak.
Neon Hula: (ᓇᓈᑐᐦᑭᑕᓯᓈᓱᐏᐣ ᐚᐏᔦᐢ): ᓇᓈᑐᐦᑭᑕᓯᓈᓱᐏᐣ ᐚᐏᔦᐢ ᒪᓯᓂᐸᔨᐦᑕᒼ ᐁ ᐘᐢᑲᐑᒋᐠ ᓂᐢᑐ ᐅᓃᒥᐦᐃᑐᐘᐠ ᐁ ᒥᔪ ᐃᑕᓯᓈᓱᒋᐠ; ᐍᐢᑕᑲᔨᐚᐘ ᑭᐦᒋᓈᑿᓇ ᐁ ᓰᐱᐦᒁᔨᑭ, ᐁ ᐍᐸᐦᑭ ᐯᔭᑿᐣ ᐃᓯ ᐅᐘᑎᐦᑿᓇ ᒥᐢᑎᑿᐠ᙮
Pink Village wâpikwanîwinâkwan ôcênâs: kâ-pah-pahkinâkosit kêhtê-aya ê-naspisîhcihiht ispimihk pâtos-âyak wâyâcâhk, ê-kiskinawâcihtât kîskwêwin êkwa misiwanâcihcikêwin kâ-pê-isi-pimâtisit, pakahkam nôkwan ôta ânisko-wâhkôhtowin iyiniw-pimâtisiwin. ocîpâyinâkosiwin nâh-nôkwaniyiw mîna pâh-pôni-nôkwaniyiw tastawic anohc pimâtisiwin êkwa kayâsêskamik pimâtisiwin.
Pink Village ᐚᐱᑿᓃᐏᓈᑿᐣ ᐆᒉᓈᐢ: ᑳ ᐸᐦ ᐸᐦᑭᓈᑯᓯᐟ ᑫᐦᑌ ᐊᔭ ᐁ ᓇᐢᐱᓰᐦᒋᐦᐃᐦᐟ ᐃᐢᐱᒥᕽ ᐹᑐᓵᔭᐠ ᐚᔮᒑᕽ, ᐁ ᑭᐢᑭᓇᐚᒋᐦᑖᐟ ᑮᐢᑵᐏᐣ ᐁᑿ ᒥᓯᐘᓈᒋᐦᒋᑫᐏᐣ ᑳ ᐯ ᐃᓯ ᐱᒫᑎᓯᐟ, ᐸᑲᐦᑲᒼ ᓅᑿᐣ ᐆᑕ ᐋᓂᐢᑯ ᐚᐦᑰᐦᑐᐏᐣ ᐃᔨᓂᐤ ᐱᒫᑎᓯᐏᐣ᙮ ᐅᒌᐹᔨᓈᑯᓯᐏᐣ ᓈᐦ ᓅᑿᓂᔨᐤ ᒦᓇ ᐹᐦ ᐴᓂ ᓅᑿᓂᔨᐤ ᑕᐢᑕᐏᐨ ᐊᓄᐦᐨ ᐱᒫᑎᓯᐏᐣ ᐁᑿ ᑲᔮᓭᐢᑲᒥᐠ ᐱᒫᑎᓯᐏᐣ᙮
Self Portrait tâpasinahamâsowin: otâpasinahikêwak mâna tâpasinahamâsowak ispîhk kâ-pâh-pêyakwâcihocik ê-âpacihtâcik onahâpaminâkosiwiniwâw ayisk ê-pêyakocik, ê-wîcihiwêcik ta-kiskinohtahikoyahkik kimâmawinitonininahk. ôma tâpasinahamâsowin masinipayiw Buffy kâ-kiskinwahâcihtât iyiniw mihkwâkan, ê-ohpît mîkisihk êkwa mîkwanihk ohci tâpiskôc omâmitonêyihtamowin êkwa opîhtâkosiwin êkwa osîhcikêwina êkota ê-nôkwahki. owîhkwâkan ohpîyiw kaskitêwi-naspitêyihtamowinihk ohci ê-nanâtohki-itasinâstêyik.
Self Portrait ᑖᐸᓯᓇᐦᐊᒫᓱᐏᐣ: ᐅᑖᐸᓯᓇᐦᐃᑫᐘᐠ ᒫᓇ ᑖᐸᓯᓇᐦᐊᒫᓱᐘᐠ ᐃᐢᐲᕽ ᑳ ᐹᐦ ᐯᔭᒁᒋᐦᐅᒋᐠ ᐁ ᐋᐸᒋᐦᑖᒋᐠ ᐅᓇᐦᐋᐸᒥᓈᑯᓯᐏᓂᐚᐤ ᐊᔨᐢᐠ ᐁ ᐯᔭᑯᒋᐠ, ᐁ ᐑᒋᐦᐃᐍᒋᐠ ᑕ ᑭᐢᑭᓄᐦᑕᐦᐃᑯᔭᐦᑭᐠ ᑭᒫᒪᐏᓂᑐᓂᓂᓇᕽ᙮ ᐆᒪ ᑖᐸᓯᓇᐦᐊᒫᓱᐏᐣ ᒪᓯᓂᐸᔨᐤ Buffy ᑳ ᑭᐢᑭᓌᐦᐋᒋᐦᑖᐟ ᐃᔨᓂᐤ ᒥᐦᒁᑲᐣ, ᐁ ᐅᐦᐲᐟ ᒦᑭᓯᕽ ᐁᑿ ᒦᑿᓂᕽ ᐅᐦᒋ ᑖᐱᐢᑰᐨ ᐅᒫᒥᑐᓀᔨᐦᑕᒧᐏᐣ ᐁᑿ ᐅᐲᐦᑖᑯᓯᐏᐣ ᐁᑿ ᐅᓰᐦᒋᑫᐏᓇ ᐁᑯᑕ ᐁ ᓅᑿᐦᑭ᙮ ᐅᐑᐦᒁᑲᐣ ᐅᐦᐲᔨᐤ ᑲᐢᑭᑌᐏ ᓇᐢᐱᑌᔨᐦᑕᒧᐏᓂᕽ ᐅᐦᒋ ᐁ ᓇᓈᑐᐦᑭ ᐃᑕᓯᓈᐢᑌᔨᐠ᙮
Shell Woman êsis iskwêw: Sainte-Marie kî-naspitêyihtamowinihkâtam nistam otâpasinahikêwina masinipayiwin êsisihk, êkwa ê-masinipayik mîna ê-âhkwêhtawastât ayiwâk sisopêkahikan otâpasinahikêwikamikohk. ôma kâ-katawasisik naspisîhcikan nôkohtâw iyiniwâtisiwin ka-pimohtêhk nisihkâc askîhk, ta-otinamihk piko anima kâ-miyikosiwit n êkwa ê-kihcêyihtamihk ôhi miyikosiwina.
Shell Woman ᐁᓯᐢ ᐃᐢᑵᐤ: Sainte-Marie ᑮ ᓇᐢᐱᑌᔨᐦᑕᒧᐏᓂᐦᑳᑕᒼ ᓂᐢᑕᒼ ᐅᑖᐸᓯᓇᐦᐃᑫᐏᓇ ᒪᓯᓂᐸᔨᐏᐣ ᐁᓯᓯᕽ, ᐁᑿ ᐁ ᒪᓯᓂᐸᔨᐠ ᒦᓇ ᐁ ᐋᐦᑵᐦᑕᐘᐢᑖᐟ ᐊᔨᐚᐠ ᓯᓱᐯᑲᐦᐃᑲᐣ ᐅᑖᐸᓯᓇᐦᐃᑫᐏᑲᒥᑯᕽ᙮ ᐆᒪ ᑳ ᑲᑕᐘᓯᓯᐠ ᓇᐢᐱᓰᐦᒋᑲᐣ ᓅᑯᐦᑖᐤ ᐃᔨᓂᐚᑎᓯᐏᐣ ᑲ ᐱᒧᐦᑌᕽ ᓂᓯᐦᑳᐨ ᐊᐢᑮᕽ, ᑕ ᐅᑎᓇᒥᕽ ᐱᑯ ᐊᓂᒪ ᑳ ᒥᔨᑯᓯᐏᐟ n ᐁᑿ ᐁ ᑭᐦᒉᔨᐦᑕᒥᕽ ᐆᐦᐃ ᒥᔨᑯᓯᐏᓇ᙮
Talk Lies kiyâskisk: êwako ôma pêyak nistam Buffy kâ-kî-tâpasinahahk naspitêyihtamowin naspisîhcikan, ‘kiyâskisk’ nîkân ê-kî-mosci-masinipêhahk. ôma naspisîhcikan kiskinohtam êkâ anima tâpitaw tâpwêwin kîkway kâ-wâpahtamihk. âta awa iyinîhkân kisâstaw ê-miyosit mâka kîkway kisâstaw mâyâtaniyiw kâ-itapit tâpiskôc ê-aswêyimot. owîhowin ohci kiwîhtamâkonaw, ê-kiyâskiskit, ê-kakwâyakihiwêt, ê-câh-cîsihiwêt, ê-wêpanamawât kahkiyaw kîkwaya otânisko-wâhkômâkana nîkân ôtê isi.
Talk Lies ᑭᔮᐢᑭᐢᐠ: ᐁᐘᑯ ᐆᒪ ᐯᔭᐠ ᓂᐢᑕᒼ Buffy ᑳ ᑮ ᑖᐸᓯᓇᐦᐊᕽ ᓇᐢᐱᑌᔨᐦᑕᒧᐏᐣ ᓇᐢᐱᓰᐦᒋᑲᐣ, ‘ᑭᔮᐢᑭᐢᑭ ᓃᑳᐣ ᐁ ᑮ ᒧᐢᒋ ᒪᓯᓂᐯᐦᐊᕽ᙮ ᐆᒪ ᓇᐢᐱᓰᐦᒋᑲᐣ ᑭᐢᑭᓄᐦᑕᒼ ᐁᑳ ᐊᓂᒪ ᑖᐱᑕᐤ ᑖᐻᐏᐣ ᑮᑿᐩ ᑳ ᐚᐸᐦᑕᒥᕽ᙮ ᐋᑕ ᐊᐘ ᐃᔨᓃᐦᑳᐣ ᑭᓵᐢᑕᐤ ᐁ ᒥᔪᓯᐟ ᒫᑲ ᑮᑿᐩ ᑭᓵᐢᑕᐤ ᒫᔮᑕᓂᔨᐤ ᑳ ᐃᑕᐱᐟ ᑖᐱᐢᑰᐨ ᐁ ᐊᓷᔨᒧᐟ᙮ ᐅᐑᐦᐅᐏᐣ ᐅᐦᒋ ᑭᐑᐦᑕᒫᑯᓇᐤ, ᐁ ᑭᔮᐢᑭᐢᑭᐟ, ᐁ ᑲᒁᔭᑭᐦᐃᐍᐟ, ᐁ ᒑᐦ ᒌᓯᐦᐃᐍᐟ, ᐁ ᐍᐸᓇᒪᐚᐟ ᑲᐦᑭᔭᐤ ᑮᑿᔭ ᐅᑖᓂᐢᑯ ᐚᐦᑰᒫᑲᓇ ᓃᑳᐣ ᐆᑌ ᐃᓯ᙮
The Mohawk Warrior Contemplates His Future nâtawêw okihcihtâw mâmitonêyihtam onîkânim: Buffy Saint-Marie onaspisîhcikana oskaya nâtawêwa ê-mâmitonêyihtamiyit onîkânim kikinam masinipayiwin, wâwiyênâkwana tâpasinahikêwina ta-nôkwaniyik onahâpamisiwin ê-ati-mêskocipayiyik. kâ-isi-kâpiwit kâh-kîhtwâm nôkwaniyiw êkwa ê-âhkwêhtawastêyik, ê-nôkwaniyik opimâtisiwin ê-yôhtênikâtêk iskwâhtêm, ê-nôkwaniyik oskâyayiwin, otânisko-wâhkômâkana, opakosêyihtamowin êkwa otitâpatisiwin.
The Mohawk Warrior Contemplates ᐦᐃᐢ Future ᓈᑕᐍᐤ ᐅᑭᐦᒋᐦᑖᐤ ᒫᒥᑐᓀᔨᐦᑕᒼ ᐅᓃᑳᓂᒼ: Buffy Saint-Marie ᐅᓇᐢᐱᓰᐦᒋᑲᓇ ᐅᐢᑲᔭ ᓈᑕᐍᐘ ᐁ ᒫᒥᑐᓀᔨᐦᑕᒥᔨᐟ ᐅᓃᑳᓂᒼ ᑭᑭᓇᒼ ᒪᓯᓂᐸᔨᐏᐣ, ᐚᐏᔦᓈᑿᓇ ᑖᐸᓯᓇᐦᐃᑫᐏᓇ ᑕ ᓅᑿᓂᔨᐠ ᐅᓇᐦᐋᐸᒥᓯᐏᐣ ᐁ ᐊᑎ ᒣᐢᑯᒋᐸᔨᔨᐠ᙮ ᑳ ᐃᓯ ᑳᐱᐏᐟ ᑳᐦ ᑮᐦᑤᒼ ᓅᑿᓂᔨᐤ ᐁᑿ ᐁ ᐋᐦᑵᐦᑕᐘᐢᑌᔨᐠ, ᐁ ᓅᑿᓂᔨᐠ ᐅᐱᒫᑎᓯᐏᐣ ᐁ ᔫᐦᑌᓂᑳᑌᐠ ᐃᐢᒁᐦᑌᒼ, ᐁ ᓅᑿᓂᔨᐠ ᐅᐢᑳᔭᔨᐏᐣ, ᐅᑖᓂᐢᑯ ᐚᐦᑰᒫᑲᓇ, ᐅᐸᑯᓭᔨᐦᑕᒧᐏᐣ ᐁᑿ ᐅᑎᑖᐸᑎᓯᐏᐣ᙮
Wesajechak The Trickster wîsahkêcâhk owawiyasihiwêw: owawiyasihiwêw kî-itâw mihcêt âtayôhkêwinihk wiya mâna nanâtohk ê-isiyayât – ôta wiya Wapoose, wâpos, isinâkosiw, mwêci-ê-ati-mêskocipayit – kihiwîkwana ê-ohtawakêt. mêtoni cîsihowêw kâ-isinâkosit ayisk ê-mâh-mêskocipayit. otâpihtêpisona naspitâtamwak mihkwâkanihkâna âcimo-mêtawêwinihk ohci, kâ-wawiyasiwik mîna kâ-kitimâkahk. kayâs-isîhcikêwinihk ohci iyiniw âtayôhkanak kî-mâh-mêskociyayâwak, pêyakwan ispîhk ê-kakwêspanêyihtâkosicik êkwa ê-sâkihiwêcik, ê-âhkwatisicik êkwa ê-wawiyasihikêcik. Buffy onâh-naspisîhcikana ohci ê-âtotahk kâ-mâmaskâtikwahk êkwa kâ-mikoskâcihtâkwahk anohc kâ-kakwê-wîhtamihk isîhcikêwina ta-nisitawinamihk anihi kâ-manitowihk mîna kâ-maci-itwêhk.
Wesajechak The Trickster ᐑᓴᐦᑫᒑᕽ ᐅᐘᐏᔭᓯᐦᐃᐍᐤ: ᐅᐘᐏᔭᓯᐦᐃᐍᐤ ᑮ ᐃᑖᐤ ᒥᐦᒉᐟ ᐋᑕᔫᐦᑫᐏᓂᕽ ᐏᔭ ᒫᓇ ᓇᓈᑐᕽ ᐁ ᐃᓯᔭᔮᐟ – ᐆᑕ ᐏᔭ Wapoose, ᐚᐳᐢ, ᐃᓯᓈᑯᓯᐤ, ᒭᒋ ᐁ ᐊᑎ ᒣᐢᑯᒋᐸᔨᐟ – ᑭᐦᐃᐑᑿᓇ ᐁ ᐅᐦᑕᐘᑫᐟ᙮ ᒣᑐᓂ ᒌᓯᐦᐅᐍᐤ ᑳ ᐃᓯᓈᑯᓯᐟ ᐊᔨᐢᐠ ᐁ ᒫᐦ ᒣᐢᑯᒋᐸᔨᐟ᙮ ᐅᑖᐱᐦᑌᐱᓱᓇ ᓇᐢᐱᑖᑕᒷᐠ ᒥᐦᒁᑲᓂᐦᑳᓇ ᐋᒋᒧ ᒣᑕᐍᐏᓂᕽ ᐅᐦᒋ, ᑳ ᐘᐏᔭᓯᐏᐠ ᒦᓇ ᑳ ᑭᑎᒫᑲᕽ᙮ ᑲᔮᓯᓰᐦᒋᑫᐏᓂᕽ ᐅᐦᒋ ᐃᔨᓂᐤ ᐋᑕᔫᐦᑲᓇᐠ ᑮ ᒫᐦ ᒣᐢᑯᒋᔭᔮᐘᐠ, ᐯᔭᑿᐣ ᐃᐢᐲᕽ ᐁ ᑲᑵᐢᐸᓀᔨᐦᑖᑯᓯᒋᐠ ᐁᑿ ᐁ ᓵᑭᐦᐃᐍᒋᐠ, ᐁ ᐋᐦᑿᑎᓯᒋᐠ ᐁᑿ ᐁ ᐘᐏᔭᓯᐦᐃᑫᒋᐠ᙮ Buffy ᐅᓈᐦ ᓇᐢᐱᓰᐦᒋᑲᓇ ᐅᐦᒋ ᐁ ᐋᑐᑕᕽ ᑳ ᒫᒪᐢᑳᑎᑿᕽ ᐁᑿ ᑳ ᒥᑯᐢᑳᒋᐦᑖᑿᕽ ᐊᓄᐦᐨ ᑳ ᑲᑵ ᐑᐦᑕᒥᕽ ᐃᓰᐦᒋᑫᐏᓇ ᑕ ᓂᓯᑕᐏᓇᒥᕽ ᐊᓂᐦᐃ ᑳ ᒪᓂᑐᐏᕽ ᒦᓇ ᑳ ᒪᒋ ᐃᑘᕽ᙮
Woman With Dolphins iskwêw mîna wâpamêkosisak: tâpwê ka-miyawâtamihk kâ-manitowakêyimiht iskwêw ê-pwâwîwit, ê-kosâpêt otaskîwâhk owîcâyâmâkana minisitikohk, manitowakêyihtam wiyawinikêwin. koskwâwâtêyihtamowin êkwa itâpatisiwin nâh-nôkwan miyo-itasinâsowinihk êkwa wîci-pimâpotêwa timi-kîsikohk.
Woman With Dolphins ᐃᐢᑵᐤ ᒦᓇ ᐚᐸᒣᑯᓯᓴᐠ: ᑖᐻ ᑲ ᒥᔭᐚᑕᒥᕽ ᑳ ᒪᓂᑐᐘᑫᔨᒥᐦᐟ ᐃᐢᑵᐤ ᐁ ᑇᐑᐏᐟ, ᐁ ᑯᓵᐯᐟ ᐅᑕᐢᑮᐚᕽ ᐅᐑᒑᔮᒫᑲᓇ ᒥᓂᓯᑎᑯᕽ, ᒪᓂᑐᐘᑫᔨᐦᑕᒼ ᐏᔭᐏᓂᑫᐏᐣ᙮ ᑯᐢᒁᐚᑌᔨᐦᑕᒧᐏᐣ ᐁᑿ ᐃᑖᐸᑎᓯᐏᐣ ᓈᐦ ᓅᑿᐣ ᒥᔪ ᐃᑕᓯᓈᓱᐏᓂᕽ ᐁᑿ ᐑᒋ ᐱᒫᐳᑌᐘ ᑎᒥ ᑮᓯᑯᕽ᙮
Yaqui From the Wings Yaqui napatêsihk ohci: Yaqui napatêsihk ohci misakâmêskam kâ-isi-kanawâpahtahk onanâtohkonikêw, ê-âniskôhtât nanâtohk mitêha mîna pêskis ê-kiskêyihtahk pâh-pîtos ê-isi-wâpahtahkik tahto kâ-kanawâpahtahkik ôma. âcimâw sâkihâkan, onîmihitow, ê-nîmihitot ê-kanawâpamikot owâhkômâkana napatêsihk ohci. patakohkâtêw kahkiyaw anihi kâ-kitâpamikot mâka pisiskâpamêw pêyak anihi kâ-kitâpamikot ê-nîmihitot. otitâpiwin nisitawinâkwaniyiw ê-kitâpamikoyahk. ôta mosci-kipihcîwin, Buffy kitâniskônikonaw osîhcikêwinihk ê-wawiyasihikêt êkwa ê-tapahtêyimisot.
Yaqui From The Wings Yaqui ᓇᐸᑌᓯᕽ ᐅᐦᒋ: Yaqui ᓇᐸᑌᓯᕽ ᐅᐦᒋ ᒥᓴᑳᒣᐢᑲᒼ ᑳ ᐃᓯ ᑲᓇᐚᐸᐦᑕᕽ ᐅᓇᓈᑐᐦᑯᓂᑫᐤ, ᐁ ᐋᓂᐢᑰᐦᑖᐟ ᓇᓈᑐᕽ ᒥᑌᐦᐊ ᒦᓇ ᐯᐢᑭᐢ ᐁ ᑭᐢᑫᔨᐦᑕᕽ ᐹᐦ ᐲᑐᐢ ᐁ ᐃᓯ ᐚᐸᐦᑕᐦᑭᐠ ᑕᐦᑐ ᑳ ᑲᓇᐚᐸᐦᑕᐦᑭᐠ ᐆᒪ᙮ ᐋᒋᒫᐤ ᓵᑭᐦᐋᑲᐣ, ᐅᓃᒥᐦᐃᑐᐤ, ᐁ ᓃᒥᐦᐃᑐᐟ ᐁ ᑲᓇᐚᐸᒥᑯᐟ ᐅᐚᐦᑰᒫᑲᓇ ᓇᐸᑌᓯᕽ ᐅᐦᒋ᙮ ᐸᑕᑯᐦᑳᑌᐤ ᑲᐦᑭᔭᐤ ᐊᓂᐦᐃ ᑳ ᑭᑖᐸᒥᑯᐟ ᒫᑲ ᐱᓯᐢᑳᐸᒣᐤ ᐯᔭᐠ ᐊᓂᐦᐃ ᑳ ᑭᑖᐸᒥᑯᐟ ᐁ ᓃᒥᐦᐃᑐᐟ᙮ ᐅᑎᑖᐱᐏᐣ ᓂᓯᑕᐏᓈᑿᓂᔨᐤ ᐁ ᑭᑖᐸᒥᑯᔭᕽ᙮ ᐆᑕ ᒧᐢᒋ ᑭᐱᐦᒌᐏᐣ, Buffy ᑭᑖᓂᐢᑰᓂᑯᓇᐤ ᐅᓰᐦᒋᑫᐏᓂᕽ ᐁ ᐘᐏᔭᓯᐦᐃᑫᐟ ᐁᑿ ᐁ ᑕᐸᐦᑌᔨᒥᓱᐟ᙮
